ಕ್ರಿಸ್ಮಸ್ನೊಂದಿಗೆ ಬೆಸೆದ ಕೇಕ್ನ ಬಾಂಧವ್ಯ
ಕ್ರಿಸ್ಮಸ್ ತಿಂಗಳು ಸಮೀಪಿಸುತ್ತಿದ್ದಂತೆ ಎಲ್ಲೆಲ್ಲೂ ನಕ್ಷತ್ರಗಳು, ಕ್ರಿಸ್ಮಸ್ ಟ್ರೀ, ಹೊಸ ಬಟ್ಟೆ ಖರೀದಿ, ಹಂಚಿ ತಿನ್ನುವ ಸಂಭ್ರಮ. ಇಡೀ ಜಗತ್ತೇ ಕ್ರಿಸ್ಮಸ್ ಹಬ್ಬ ಆಚರಿಸಿದರೂ ಕ್ರೈಸ್ತ ಸಮುದಾಯಕ್ಕೆ ಮಾತ್ರ ಕ್ರಿಸ್ಮಸ್ ಬಹಳ ಶ್ರೇಷ್ಠ ಹಬ್ಬ. ಯೇಸುವಿನ ಜನ್ಮದಿನವನ್ನು ಕ್ರಿಸ್ಮಸ್ ಹಬ್ಬವಾಗಿ ಆಚರಿಸುವ ಕ್ರೈಸ್ತ ಸಮುದಾಯ ಕ್ರಿಸ್ಮಸ್ನ ಮೂರು ವಾರಗಳ ಕಾಲ ಕ್ರೈಸ್ತನ ಆಗಮನದ ಸಂಕೇತದ ಕಾಲಮಾನವಾಗಿದ್ದು, ಈ ಕಾಲಾವಧಿಯಲ್ಲಿ ಯಾವುದೇ ಸಂಭ್ರಮದ ಕಾರ್ಯಕ್ರಮಗಳನ್ನು ಆಚರಿಸದೆ, ಆ ನಂಬಿಕೆಯನ್ನು ಇಂದಿಗೂ ಉಳಿಸಿಕೊಂಡು ಬಂದಿದ್ದಾರೆ.
ಕೇಕ್ ಎಂದರೆ ಅದರ ಗಾತ್ರ, ವಿನ್ಯಾಸ, ಬಣ್ಣಗಳ ಬಗ್ಗೆ ಜನರಲ್ಲಿ ಒಂದು ಕಲ್ಪನೆ ಇತ್ತು. ಕೇಕ್ ಎಂದರೆ ಅಷ್ಟೇ ಅಲ್ಲ, ಕೇಕ್ ಎಂದರೆ ಇಂದು ಜನರ ಕಲ್ಪನೆಗೂ ವೀರಿ ನಿಂತು ಕೇಕ್ಶೋ ಎಂಬ ಹೊಸ ಕಾನ್ಸೆಪ್ಟ್ ಬೆಳೆದಿದೆ. ಗೇಟ್ ವೇ ಆಫ್ ಇಂಡಿಯಾ ಕೂಡಾ ಕೇಕ್ ಆಗಬಹುದು ಎಂಬುದನ್ನು ಕೇಕ್ ಶೋಗಳು ಸಾಬೀತುಪಡಿಸುತ್ತಿವೆ. ಮತ್ಸ್ಯಲೋಕದ ಮತ್ಸ್ಯಕನ್ಯೆಯೂ ಕೇಕ್ ಮೂಲಕ ಪ್ರತಿಕೃತಿಯಾಗುತ್ತಾಳೆ. ಈಗ ಕೇಕ್ ಮೂಲಕ ಬಾಯಿಗೆ ಸಿಹಿ ಹಂಚುವ ಕಾಲ ಮುಗಿದು, ವಿಭಿನ್ನ ಕಲಾಕೃತಿ ಕೇಕ್ ಮೂಲಕ ಜನರ ಕಣ್ಣಿಗೆ ಸಿಹಿ ಹಂಚುವ ಮೂಲಕ ನೋಡುಗರ ಬಾಯಲ್ಲಿ ನೀರೂರಿಸುವ ಕಾಲ ಬೆಳೆದು ನಿಂತಿದೆ. ಇಂತಹ ಕೇಕ್ಗಳನ್ನು ತಿನ್ನುವುದರಲ್ಲಿ ಇರುವ ಖುಷಿಗಿಂತ ನೋಡುವುದರಲ್ಲೇ ಸಂತೋಷ ಹೆಚ್ಚು. ಒಂದು ನಿಟ್ಟಿನಲ್ಲಿ ಡಿಸೆಂಬರ್ ತಿಂಗಳಲ್ಲಿ ಹಲವೆಡೆ ಕೇಕ್ ಜಾತ್ರೆಯೇ ನಡೆಯುತ್ತದೆ.
ಕೇಕ್ನ ಇತಿಹಾಸ
ಇತಿಹಾಸದಿಂದಲೂ ಪ್ಲಮ್ಕೇಕ್ ಕ್ರಿಸ್ಮಸ್ ಸಂಭ್ರಮದಲ್ಲಿ ಮೊದಲ ಸ್ಥಾನವನ್ನು ಆಕ್ರಮಿಸಿಕೊಂಡಿದೆ. ಪ್ಲಮ್ಕೇಕ್ನ ಇತಿಹಾಸ ಮಧ್ಯಕಾಲೀನ ಇಂಗ್ಲೆಂಡ್ನಲ್ಲಿ ಪ್ರಾರಂಭವಾಗುತ್ತದೆ. ಆಗಿನ ಸಂಪ್ರದಾಯದ ಪ್ರಕಾರ ಕ್ರಿಸ್ಮಸ್ ಸಮಯದಲ್ಲಿ ಓಟ್ಸ್, ಡ್ರೈಫ್ರುಟ್ಸ್, ಮಸಾಲೆ, ಜೇನುತುಪ್ಪ ಹಾಕಿ ತಯಾರಿಸಿದ ಗಂಜಿ ತಿನ್ನಲಾಗುತ್ತಿತ್ತು. ಕೆಲವೊಂದು ಸಂದರ್ಭಗಳಲ್ಲಿ ಮಾಂಸದಿಂದಲೂ ಗಂಜಿ ತಯಾರಿಸುತ್ತಿದ್ದರು. ಕಾಲ ಉರುಳಿದಂತೆ, ಕ್ರಿಸ್ಮಸ್ ಗಂಜಿಗೆ ಹೆಚ್ಚು ಪದಾರ್ಥಗಳನ್ನು ಸೇರಿಸುತ್ತಾ ಪ್ರಸ್ತುತ ಇರುವ ಕೇಕ್ಗಳ ಮಾದರಿಗೆ ರೂಪಾಂತರಗೊಂಡವು.
19ನೇ ಶತಮಾನದ ಅಂತ್ಯದಲ್ಲಿ ವಿಕ್ಟೋರಿಯಾ ರಾಣಿ ಹನ್ನೆರಡನೇ ರಾತ್ರಿಯ ಹಬ್ಬವನ್ನು ನಿಷೇಧಿಸಿದಾಗಲೂ ಕೇಕ್ ಮಾತ್ರ ಹಾಗೇ ಉಳಿಯಿತು. ಅಂಗಡಿಯವರು ಹನ್ನೆರಡನೆ ರಾತ್ರಿಗೆ ತಯಾರಿಸಿಟ್ಟ ಪ್ಲಮ್ನ್ನು ಕ್ರಿಸ್ಮಸ್ ದಿನಕ್ಕೆ ಬಳಸಿದರು. ವ್ಯಾಪಾರವಾಗಿಯೂ ಇದೇ ಸಂಪ್ರದಾಯ ಮುಂದುವರಿಯಿತು.
ಅದೇ ಸಮಯಕ್ಕೆ ಬ್ರಿಟಿಷ್ ವಸಾಹತುಗಳಾದ ಆಸ್ಟ್ರೇಲಿಯಾ, ಅಮೇರಿಕಾ, ಕೆನಡಾ ಮತ್ತು ಪ್ರಪಂಚದ ಇತರ ಭಾಗಗಳಲ್ಲಿ ಕೆಲಸ ಮಾಡುತ್ತಿದ್ದ ತಮ್ಮ ಮನೆಯವರಿಗೆ ಒಂದು ತಿಂಗಳು ಮುಂಚಿತವಾಗಿಯೇ ಕೇಕ್ ತಯಾರಿಸಿ, ವೈನ್ ಮತ್ತು ಉಡುಗೊರೆಗಳೊಂದಿಗೆ ಕಳುಹಿಸಿಕೊಡುತ್ತಿದ್ದರಿಂದ ಕೇಕ್ ಸಂಪ್ರದಾಯ ಇಂಗ್ಲೆಂಡ್ನಿಂದ ಹೊರದೇಶಗಳಿಗೂ ಲಗ್ಗೆಯಿಟ್ಟವು. ಇಂಗ್ಲೆಂಡ್ನಿಂದ ಹೊರಬಂದ ಈ ಪ್ಲಮ್ಕೇಕ್ ದೇಶ, ಪ್ರದೇಶ, ಕುಟುಂಬಗಳಿಗನುಗುಣವಾಗಿ ಬೇರೆ ಬೇರೆ ರೀತಿಯ ರೆಸಿಪಿಗಳನ್ನು ಪಡೆಯುತ್ತಾ ಬಂದವು.
ಫ್ರ್ಯಾಂಕ್ಲಿನ ಡಿ'ಸೋಜ, ಬೆಂಗಳೂರು
ಕ್ರಿಸ್ಮಸ್ ಎಂದರೆ ನಮಗೆ ತುಂಬಾ ಸಡಗರ. ಚರ್ಚ್ನಲ್ಲಿ ಪ್ರಾರ್ಥನೆ, ಹೊಸ ಬಟ್ಟೆ ಖರೀದಿಸುವುದಕ್ಕಿಂತಲೂ ಆ ಸಮಯದಲ್ಲಿ ಹಲವಾರು ತಿಂಡಿಗಳು ಸಿಗುತ್ತವೆ ಎನ್ನುವುದೇ ಖುಷಿ. ಅದಕ್ಕಿಂತ ನಾವು ಮನೆಯವರೆಲ್ಲಾ ಒಟ್ಟಿಗೆ ಸೇರಿ, ತಿಂಡಿಗೆ, ಕೇಕ್ಗೆ ಪಾಕ ಮಿಶ್ರಣ ಮಾಡಿ, ಅದನ್ನು ತಯಾರಿಸುವುದು, ಅದರೊಂದಿಗೆ ಮಾತು, ನಗು ಕೂಡ ಸೇರಿ, ಸಂತೋಷ ಸಡಗರ ದುಪ್ಪಾಟ್ಟಾಗುತ್ತಿತ್ತು. ಆ ಡಿಸೆಂಬರ್ ತಿಂಗಳಿಗಾಗಿಯೇ ಕಾದು ಕೂರುವ ಕ್ಷಣಗಳೇ ಚೆನ್ನಾಗಿರುತ್ತಿತ್ತು. ಆದರೆ, ಈಗ ಎಲ್ಲರೂ ಬ್ಯುಸಿಯಾಗಿಒದ್ದಾರೆ. ಇತ್ತೀಚೆಗೆ ತಿಂಡಿ, ಕೇಕ್ಗಳನ್ನು ಮನೆಯಲ್ಲಿ ಮಾಡುವುದಕ್ಕಿಂತ ಅಂಗಡಿ, ಬೇಕರಿಗಳಿಂದ ಖರೀದಿಸುವುದೇ ಹೆಚ್ಚಾಗಿದೆ. ಎಲ್ಲರೂ ಒಟ್ಟಾಗಿ ಸೇರಿ ಕೆಲಸ ಮಾಡುವ ಖುಷಿಯೂ ಕಡಿಮೆಯಾಗಿದೆ.
